¹ Mina-ke, ngomnyaka wokuqala kaDariyu umM ede, ngema ukumqinisa ukuba abe namandla. ² Kalokhu ngiyakukutshela iqiniso. Bheka, kusezakuvela amakhosi amathathu ePheresiya; eyesine iyakunotha kunawo onke ; isiqinile ngengcebo yayo iyakuvusa bonke ukulwa nombuso waseJavani. ³ Kuyakuvela inkosi enamandla eyakubusa ngokubusa okukhulu , yenze njengentando yayo. ⁴ Iyakwanele ukuvela nje , umbuso wayo uyakufohlozwa, wahlukaniselwe emimoyeni yomine yezulu , ungabi ngowenzalo yayo , ungabi njengasekubuseni kwayo eyabusa ngakho , ngokuba umbuso wayo uyakusishulwa, ube ngowabanye ngaphandle kwalaba. ⁵ Inkosi yaseningizimu iyakuba namandla , kanjalo esinye sezikhulu zayo , yebo, sibe namandla kunayo , sibuse, nokubusa kwaso kuyakuba ngukubusa okukhulu. ⁶ Ngasekupheleni kweminyaka bayakuhlangana , kufike indodakazi yenkosi yaseningizimu enkosini yasenyakatho ukwenza isivumelwano ; kepha ayiyikugcina amandla engalo, nayo inkosi ayiyikuma nengalo yayo , kodwa iyakunikelwa nabayilethayo, nowayizalayo, nowayisizayo ngalezo zikhathi. ⁷ Kepha ehlumeleni lezimpande zayo kuyakuvela omun ye esikhundleni sayo oyakuya empini , angene enqabeni yenkosi yasenyakatho , amelane nabo, ahlule. ⁸ Nawonkulunkulu babo kanye nezithombe zabo ezibunjiweyo nezitsha zabo ezinxanelekayo zesiliva nezegolide uyakukuthumba , akuyise eGibithe , ayiyeke inkosi yasenyakatho iminyaka ethile. ⁹ Kepha yona iyakungena embusweni wenkosi yaseningizimu, kodwa iyakubuyela ezweni lakubo. ¹⁰ Amadodana ayo ayakuhloma , abuthe isixuku sezimpi eziningi ; ziyakufika nokufika, zikhukhule, zidlule; ziyakubuya, zilwe kuze kube senqabeni yayo. ¹¹ Inkosi yaseningizimu iyakubaba , iphume, ilwe nenkosi yasenyakatho ; iyakuveza isixuku esikhulu, isixuku sinikelwe esandleni sayo. ¹² Kepha isixuku sesisusiwe , inhliziyo yayo iyakuziphakamisa , iwise phansi izinkulungwane ezingamashumi amaningi, kepha ayiyikuba namandla. ¹³ Inkosi yasenyakatho iyakubuya, iveze isixuku esikhulu kunesokuqala , ifike nokufika ngasekupheleni kwezikhathi eziyiminyaka nempi enkulu nempahla eningi. ¹⁴ Ngalezo zikhathi abaningi bayakuyisukela inkosi yaseningizimu , nabaphangi babantu bakho bayakuziphakamisa ukuwuqinisa umbono, kepha bayakuwa. ¹⁵ Iyakufika inkosi yasenyakatho, inqwabele iduli, ithathe umuzi obiyelweyo; izingalo zaseningizimu aziyikuma , nabantu bayo abakhethiweyo abayikuba namandla okuma. ¹⁶ Kepha omsukelayo uyakwenza njengentando yakhe , akakho oyakuma phambi kwakhe; uyakuma ezweni elihle, abhubhise ngesandla sakhe. ¹⁷ Uyakubhekisa ubuso bakhe ukufika namandla ombuso wakhe wonke kanye nezivumelwano, azenze; uyakumnika indodakazi yabesifazane , ayonakalise, kepha ayiyikuma, ingabi ngowakhe. ¹⁸ Useyakubuphendulela ubuso bakhe eziqhingini , athathe eziningi , kepha isikhulu siyakuqeda ihlazo elenziwa nguye, futhi sibuyisele ihlazo lakhe kuye. ¹⁹ Useyakubuphendulela ubuso bakhe ezinqabeni zezwe lakubo , kepha uyakukhubeka, awe, angabe esafunyanwa. ²⁰ Bese kuvela esikhundleni sakhe oyakudlulisa umthelisi emhlobisweni wombuso, kepha ngezinsuku eziyingcosana uyakubhujiswa , kungabi ngolaka nangokulwa kodwa. ²¹ Esikhundleni sakhe kuyakuvela odelelekileyo abangamnikanga udumo lobukhosi; uyakufika ngesikhathi sokuthula, athathe umbuso ngobushelezi. ²² Ngengalo yesifufula bayakukhukhulwa ebusweni bakhe , babhujiswe, yebo, nesikhulu sesivumelwano. ²³ Emva kokuvumelana naye uyakusebenza ngenkohliso, ngokuba uyakukhuphuka, abe namandla enesizwe esincane nje. ²⁴ Ngesikhathi sokuthula uyakusukela izindawo ezinonileyo zesifunda , akwenze okungenziwanga ngoyise nangoyisemkhulu : uyakuhlakaza phakathi kwabo impango , nengcugco, nempahla, acebe amacebo ngezinqaba kube yisikhathi. ²⁵ Uyakuvusela inkosi yasenin gizimu amandla akhe nesibindi sakhe ngempi enkulu, inempi enkulu enamandla impela ; kepha ayiyikuma , ngokuba bayakuceba amacebo ngayo. ²⁶ Abadla ukudla kwayo okumnandi bayakuyibhubhisa, impi yayo ikhukhulwe; abaningi bayakuwa phansi begwaziwe. ²⁷ Amakhosi-ke omabili, izinhliziyo zawo ziyakuba ngezokwenza okubi ; ayakukhuluma amanga esetafuleni linye , kepha akuyikuphumelela, ngokuba ukuphela kusezakuba sesikhathini esimisiweyo. ²⁸ Bese ibuyela ezweni lakubo inempahla enkulu , inhliziyo yayo imelane nesivumelwano esingcwele; isikwenzile iyakubuyela ezweni lakubo. ²⁹ Ngesikhathi esinqunyiweyo iyakubuya , iye eningizimu; kepha akuyikuba sekugcineni njengasekuqaleni. ³⁰ Imikhumbi yaseKitimi iyakuyisukela ; bese idabuka , ibuye ithukuthelele isivumelwano esingcwele, ifeze; iyakubuya, inake abasishiyile isivumelwano esingcwele. ³¹ Izimpi ziyakuvela nayo, zingcolise indlu engcwele, inqaba, zisuse umnikelo oshiswa imihla yonke, zimise isinengiso esichithayo. ³² Iyakonakalisa ngokuthopha abaphatha kabi isivumelwano , kepha abantu abamaziyo uNkulunkulu wabo bayakuba namandla, baphikelele. ³³ Abahlakaniphileyo babantu bayakuqondisa abaningi ; kepha bayakuwa ngenkemba, nangelangabi, nangokuthunjwa, nangokuphangwa izinsuku eziningi. ³⁴ Ekuweni kwabo bayakusizwa ngokusizwa okuncane , bese bebambelela kubo abaningi ngokuthopha. ³⁵ Abanye kwabahlakaniphileyo bayakuwa ukuba bacwengisiswe, bahlanzwe, benziwe mhlophe kuze kube sesikhathini sokuphela , ngokuba kusezakuba sesikhathini esimisiweyo. ³⁶ Inkosi iyakwenza njengentando yayo , iziphakamise, izikhulise phezu kwabo bonke onkulunkulu , ikhulume okumangalisayo ngoNkulunkulu wawonkulunkulu, ibe nenhlanhla luze luphelele ulaka, ngokuba okumisiweyo kuyakwenziwa. ³⁷ Ayiyikunakekela onkulunkulu bawoyise nofiswa yisifazane , inganaki nonkulunkulu oyedwa, ngokuba iyakuzikhulisa phezu kwabo bonke. ³⁸ Kepha unkulunkulu wezinqaba uyakumdumisa esikhundleni sabo , nonkulunkulu ababengamazi oyise uyakumdumisa ngegolide , nangesiliva, nangamatshe anqabileyo nangokunye okuthandiweyo. ³⁹ Iyakwenze njalo ezinqabeni ez inamandla inonkulunkulu ongowabezizwe ; omvumayo iyakumandisela udumo , imenze ukuba abuse abaningi , imahlukanisele izwe libe ngumvuzo wakhe. ⁴⁰ Ngesikhathi sokuphela inkosi yaseningizimu iyakuqhubukushana nayo ; inkosi yasenyakatho isiyakuvunguzela yona ngez inqola, nangabamahhashi, nangemikhumbi eminingi, ingene emazweni amaningi, ikhukhule, idlule. ⁴¹ Iyakungena nasezweni elihle , namanye amaningi ayakukhubeka , kepha lana ayakophulwa esandleni sayo : o-Edomi, noMowabi, nemvama yabantwana bakwa-Amoni. ⁴² Iyakwelulela isandla emazweni, nezwe laseGibithe aliyikubaleka. ⁴³ Iyakubusa phezu kwengcebo yegolide nesiliva , naphezu kwakho konke okuthandiweyo kwaseGibithe; amaLubi namaKushe ayakuba sezinyathelweni zayo. ⁴⁴ Iyakwethuswa yimibiko evela empumalanga nasenyakatho ; iyakuphuma ngokufutheka okukhulu ukuchitha nokubhubhisa abaningi. ⁴⁵ Iyakumisa itende lendlu yayo yobukhosi phakathi kolwandle nentaba enhle engcwele; kepha iya nokho ekupheleni kwayo, akakho ongayisiza.