¹ Khona abaFarisi nababhali bafika kuJesu bevela eJerusalema, bathi: ² Yini ukuba abafundi bakho beqe isiko labadala na ? Ngokuba abahlambi izandla nxa bedla isinkwa. ³ Kepha waphendula , wathi kubo : Nani, yini ukuba neqe umyalo kaNkulunkulu ngenxa yesiko lenu na? ⁴ Ngokuba uNkulunkulu wathi: Yazisa uyihlo nonyoko, nokuthi: Othuka uyise noma unina makafe nokufa. ⁵ Kepha nina nithi: Oshoyo kuyise noma kunina ukuthi : Kungumnikelo lokho ongabe usizwe yimi ngakho, ⁶ akayikwazisa uyise noma unina ; kanjalo nilenze laba yize izwi likaNkulunkulu ngesiko lenu. ⁷ Bazenzisi, waprofetha kahle ngani u-Isaya, ethi: ⁸ Lesi sizwe singidumisa ngezindebe zomlomo , kepha inhliziyo yaso ikude nami; ⁹ kodwa bangikhonza ngeze befundisa izifundiso eziyimiyalo yabantu. ¹⁰ Wayesebabiza abantu, wathi kubo: Yizwani, niqonde. ¹¹ Akusikho okungena emlonyeni okungcolisa umuntu ; kepha okuphuma emlonyeni lokhu kungcolisa umuntu. ¹² Khona kwasondela abafundi bakhe , bathi kuye : Uyazi ukuthi abaFarisi bathe bezwa lelo zwi, bakhubeka na? ¹³ Kepha waphendula wathi : Yileso naleso sithombo esingatshalwanga nguBaba wasezulwini siyakusishulwa. ¹⁴ Bayekeni; bangabaholi abayizimpumputhe; kepha nxa impumputhe ihola impumputhe, ziyakuyela emgodini zombili. ¹⁵ UPetru waphendula, wathi kuye: Sichasisele lo mfanekiso. ¹⁶ Wayesethi: Kanti nani nisengabangaqondiyo na? ¹⁷ Anikaqondi yini ukuthi konke okungena emlonyeni kuya esiswini , kuze kulahlelwe ngaphandle na? ¹⁸ Kepha okuphuma emlonyeni kuvela enhliziyweni ; lokho-ke kuyamngcolisa umuntu. ¹⁹ Ngokuba enhliziyweni kuvela izizindlo ezimbi , ukubulala, ukuphinga, ubufebe, ukweba, ukufakaza amanga, ukuhlambalaza. ²⁰ Yilezo zinto ezimngcolisayo umuntu ; kodwa ukudla ngezandla ezingahlanjiwe akumngcolisi umuntu. Owesifazane waseKhanani (Mark. 7:24) ²¹ UJesu ephuma lapho wamuka, waya emaphandleni aseTire naseSidoni. ²² Bheka, kwavela emikhawulweni yakhona owesifazane waseKhanani , wakhala wathi : Ngihawukele, Nkosi, Ndodana kaDavide ! Indodakazi yami ikhwelwe kabi yidemoni. ²³ Kepha akamphendulanga ngazwi . Base besondela kuye abafundi bakhe , bamncenga, bathi: Mmukise ngokuba uyakhala emva kwethu. ²⁴ Kodwa waphendula wathi: Angithunyelwanga kwabanye, kuphela ezimvini ezilahlekileyo zendlu yakwa-Israyeli. ²⁵ Kepha wayeseza, wakhuleka kuye wathi: Nkosi ngisize. ²⁶ Waphendula wathi : Akukuhle ukuthatha isinkwa sabantwana , usiphonse ezinjaneni. ²⁷ Yena wathi: Yebo, Nkosi; kepha nezinjana zidla imvuthuluka ewa etafuleni labaninizo. ²⁸ Khona uJesu waphendula , wathi kuye : O mame , kukhulu ukukholwa kwakho; makube kuwe njengokuthanda kwakho. Indodakazi yakhe yasinda kusukela kuleso sikhathi. UJesu uphulukisa iziguli; usuthisa amadoda ayizinkulungwane ezine (Mark. 7:31; 8:1) ²⁹ Wasuka lapho uJesu , wafika ngaselwandle lwaseGalile , wenyukela entabeni, wahlala phansi khona. ³⁰ Kwase kusondela kuye izixuku eziningi zinezinyonga , nezimpumputhe, nezimungulu, nezilima, nabanye abaningi, zababeka ngasezinyaweni zakhe ; wabaphulukisa, ³¹ baze bamangala abantu bebona izimungulu zikhuluma , izilima zisindile , izinyonga zihamba, izimpumputhe zibona ; bamdumisa uNkulunkulu ka - Israyeli. ³² UJesu wayesebabiza abafun di bakhe , wathi: Ngiyasihawukela isixuku , ngokuba sekuyizinsuku ezintathu sihlezi kimi , singenanto yokudla ; angithandi ukubamukisa belambile , funa mhlawumbe baphele amandla endleleni. ³³ Bathi kuye abafundi : Singazitholaphi ehlane izinkwa ezingaka zokuba kusuthe isixuku esingaka na? ³⁴ Wathi kubo uJesu : Ninezinkwa ezingaki na ? Bathi: Eziyisikhombisa, nezinhlanzana eziyingcosana. ³⁵ Wayala isixuku ukuba sihlale phansi; ³⁶ wazithabatha izinkwa eziyisikhombisa nezinhlanzi, wabonga, wazihlephula, wanika abafundi, abafundi baphakela izixuku. ³⁷ Badla bonke , basutha, babutha imvuthuluka eseleyo , amaqoma ayisikhombisa agcwele. ³⁸ Kepha abadlayo babe yizinkulungwane ezine zamadoda ngaphandle kwabesifazane nabantwana. ³⁹ Esezimukisile izixuku wangena emkhunjini , wafika emik hawulweni yaseMagadana.