¹ Yilezi izahlulelo ozakuzimisa phambi kwabo. ² Uma uthenga isigqila esingumHeberu, siyakusebenza iminyaka eyisithupha; ngowesikhombisa siyakuphuma sikhululekile ngesihle. ³ Uma singena sisodwa , siyakuphuma sisodwa ; uma siganiwe , umkaso uyakuphuma naso. ⁴ Uma inkosi yaso isinika umfazi , yena esizalela amadodana noma amadodakazi, umfazi nabantwana bakhe bayakuba ngabenkosi yakhe , sona siphume sodwa. ⁵ Uma isigqila siyakusho nokusho ukuthi : Ngiyathanda inkosi yami , nomkami, nabantwana bami, angiyikuphuma ngikhululekile, ⁶ khona inkosi yaso iyakusiyisa kuNkulunkulu , isimise emnyango noma ensikeni yomnyango , inkosi yaso ibhoboze indlebe yaso ngosungulo , size simkhonze kuze kube phakade. ⁷ Uma umuntu ethengisa ngendodakazi yakhe , ibe yisigqilakazi, ayiyikuphuma njengalokhu ziphuma izigqila. ⁸ Uma sisibi emehlweni enkosi yaso ezimisele sona, yovuma ukuba sihlengwe; ayiyukuba namandla okuthengisa ngaso kubo abafokazi , njengokuba isiphathe ngenkohliso. ⁹ Uma isimisela indodana yayo, yosiphatha njengamadodakazi. ¹⁰ Uma iyithathela esinye , ayiyikunciphisa ukudla kwaso , nezingubo zaso , namalungelo omshado. ¹¹ Uma ingasenzeli lokho okuthathu , siyakuphuma ngesihle ngaphandle kwemali. ¹² Oshaya umuntu aze afe, wobulawa nokubulawa. ¹³ Kepha uma ebengamqamekeli, uNkulunkulu emnikela nje esandleni sakhe, ngiyakukumisela indawo ayakubalekela kuyo. ¹⁴ Uma umuntu esukela umakhelwane wakhe , ambulale ngobuqili, womsusa nase-altare lami ukuba afe. ¹⁵ Oshaya uyise nonina wobulawa nokubulawa. ¹⁶ Oweba umuntu , athengise ngaye , noma efunyanwa esesesandleni sakhe , wobulawa nokubulawa. ¹⁷ Othuka uyise nonina wobulawa nokubulawa. ¹⁸ Nxa abantu belwa , omunye ashaye omunye ngetshe noma ngenqindi yakhe, angafi kepha alale embhedeni, ¹⁹ khona-ke, uma elulama , ahambahambe phandle ngenduku yakhe , owamshayayo uyakuyekelwa , amkhokhele nokho isikhathi sakhe esaphukileyo, elashwe nokwelashwa. ²⁰ Uma umuntu eshaya isigqila sakhe noma isigqilakazi sakhe ngenduku , size sife phansi kwesandla sakhe, wojeziswa nokujeziswa. ²¹ Kepha uma sihlala usuku lube lunye noma zibe zimbili , akayikujeziswa, ngokuba siyimali yakhe. ²² Uma abantu belwa, balimaze owesifazane okhulelweyo , size siphuphume isisu sakhe, kungaveli enye ingozi kodwa, wohlawuliswa impela njengalokho indoda yomfazi iyakubeka kuye, akhokhe njengesinqumo sabahluleli. ²³ Uma kuvela ingozi, wokwenana ukuphila ngokuphila: ²⁴ iso ngeso, izinyo ngezinyo, isandla ngesandla, unyawo ngonyawo, ²⁵ ukushiswa ngokushiswa, inxeba ngenxeba, umvimbo ngomvimbo. ²⁶ Uma umuntu eshaya iso lesigqila sakhe noma iso lesigqilakazi sakhe , alibulale, wosikhulula ngenxa yeso laso. ²⁷ Uma eshaya izinyo lesigqila sakhe noma izinyo lesigqilakazi sakhe , wosikhulula ngenxa yezinyo laso. ²⁸ Uma inkabi iqhubukusha owesilisa noma owesifazane baze bafe , inkabi yokhandwa ngamatshe impela , inyama yayo ingadliwa ; kepha umnininkabi uyakuyekelwa. ²⁹ Kepha uma inkabi ibizinge ihlaba nangaphambili , futhi lokhu kufakaziwe kumniniyo, engayigcinanga kodwa , inkabi isibulele owesilisa noma owesifazane, leyo nkabi yokhandwa, abulawe nomniniyo. ³⁰ Uma kubekwa phezu kwakhe ihlawulo , uyakukhokha konke okubekwa phezu kwakhe, kube yisihlengo sokuphila kwakhe. ³¹ Noma iqhubukusha indodana noma iqhubukusha indodakazi, makwenziwe kuye njengaleso sahlulelo. ³² Uma inkabi iqhubukusha isigqila noma isigqilakazi , uyakunika inkosi yaso amashekeli angamashumi amathathu esiliva, inkabi ikhandwe ngamatshe. ³³ Uma umuntu evula umgodi , noma emba umgodi engawusibekeli, kukhalakathele kuwo inkabi noma imbongolo, ³⁴ umninimgodi uyakukhokha, amnike umniniyo imali, efileyo ibe ngeyakhe. ³⁵ Uma inkabi yomuntu ihlaba eyomunye ize ife , bayakuthengisa ngenkabi ephilayo, bahlukaniselane imali yayo, bahlukaniselane nefileyo futhi. ³⁶ Kodwa uma kwaziwa ukuthi inkabi ibizinge ihlaba nangaphambili , umniniyo engayigcinanga kodwa , uyakuyikhokha nokuyikhokha inkabi ngenkabi, efileyo ibe ngeyakhe.