¹ Wayesethi kubo : Ngiqinisile ngithi kini : Bakhona abanye kwabemi lapha abangayikuzwa ngempela ukufa , baze babone umbuso kaNkulunkulu ufikile ngamandla. Ukukhazimuliswa kukaJesu entabeni (Math. 17:1; Luk. 9:28) ² Emva kwezinsuku eziyisithupha uJesu wathatha oPetru , noJakobe, noJohane, wakhuphukela nabo entabeni ende bebodwa ; waphenduka esinye isimo phambi kwabo. ³ Izingubo zakhe zacwazimula zaba mhlophe qw a, ngangokuba umhlanzi wasemhlabeni angezenze zibe mhlophe kangaka. ⁴ Kwabonakala kubo u-Eliya enoMose; babekhuluma noJesu. ⁵ Wathatha uPetru , wathi kuJesu : Rabi, kuhle ukuba silapha ; masakhe amadokodo amathathu, elinye libe ngelakho, elinye libe ngelikaMose, elinye libe ngelika-Eliya. ⁶ Wayengazi ukuthi uzakuphendula ngokuthini, ngokuba babesaba kakhulu. ⁷ Kwase kufika ifu , libasithibeza; kwavela izwi efwini , lithi: Lo uyiNdodana yami ethandekayo; yizweni. ⁸ Kwathi masinyane beqalaza , ababe besabona muntu , kuphela uJesu yedwa enabo. ⁹ Besehla entabeni , wabayala ukuba bangatsheli muntu abakubonileyo , iNdodana yomuntu ingakavuki kwabafileyo. ¹⁰ Bazigcinela lelo zwi bebuzana ngokuthi kuyini lokho ukuvuka kwabafileyo. ¹¹ Base bembuza , bethi: Basholoni ababhali ukuthi u-Eliya umelwe ukufika kuqala na? ¹² Wayesethi kubo : Nempela u -Eliya uyeza kuqala ukuba abuyisele konke ; kepha kulotshiwe kanjani ngeNdodana yomuntu ukuthi izakuhlupheka ngokuningi, idelelwe, na? ¹³ Kodwa ngithi kini : U-Eliya sewafika , benza kuye abakutha ndayo, njengalokho kulotshiwe ngaye. Ukuphulukiswa komfana onesithuthwane (Math. 17:14; Luk. 9:37) ¹⁴ Kwathi sebeza kubafundi , babona isixuku esikhulu sibahaqile nababhali bebuzana nabo. ¹⁵ Isixuku sonke sambona qede sashaywa luvalo , sagijimela kuye , sambingelela. ¹⁶ Wayesebabuza ethi: Nibuzana nabo ngantoni na? ¹⁷ Omunye wesixuku wamphendula wathi : Mfundisi, ngilethe kuwe indodana yami enomoya oyisimungulu. ¹⁸ Kuthi lapho eyibambayo , uyidonsela phansi , ikhihlize amagwebu , igedle amazinyo, iphele amandla. Ngikhulume nabafundi bakho ukuba bamkhiphe, kepha bahluleka. ¹⁹ Waphendula wathi: O sizukulwane esingakholwayo, koze kube nini nginani na? Koze kube nini nginibekezelela na? Yiletheni kimi. ²⁰ Bayiletha kuye . Kwathi umoya embona , wayihlukumeza kakhulu masinyane, yawa phansi emhlabathini, yazigingqa ikhihliza amagwebu. ²¹ Wayesebuza kuyise ukuthi isikhathi sesingakanani ifikelwe yilokhu na ? Wathi: Kwasebuntwaneni. ²² Uyiphonsile kaningi emlilweni nasemanzini ukuba ayibhubhise; kodwa uma unamandla okwenza utho, sihawukele, usisize. ²³ UJesu wayesethi kuye: Uma unamandla! Konke kungenzeka kokholwayo. ²⁴ Uyise womntwana wayesememeza masinyane , wathi: Ngiyakholwa, siza ukungakholwa kwami. ²⁵ UJesu esebona ukuthi isixuku sigijimela ndawonye , wamkhuza umoya ongcolileyo, wathi kuye: Wena moya oyisimungulu nesithulu ngiyakuyala mina, ngithi: Phuma kuye, ungabe usangena kuye. ²⁶ Wamemeza, wamhlukumeza kakhulu, waphuma; waba njengofileyo , baze bathi abaningi: Usefile. ²⁷ Kepha uJesu wambamba ngesandla, wamvusa; wasukuma. ²⁸ Kuthe esengenile endlini, abafundi bakhe bambuza bebodwa , bathi: Thina besingemkhiphe ngani na? ²⁹ Wayesethi kubo: Lolu hlobo lungephume ngalutho , kuphela ngokukhuleka nangokuzila ukudla. UJesu ukhuluma futhi ngokuhlupheka kwakhe (Math. 17:22; Luk. 9:43) ³⁰ Bamuka lapho, badabula iGalile, wayengathandi ukuba kwaziwe muntu, ³¹ ngokuba wabafundisa abafundi bakhe , wathi kubo : INdodana yomuntu ikhashelwa ezandleni zabantu , bazakuyibulala; kuthi isibulewe , izakuvuka emva kwezinsuku ezintathu. ³² Kepha abakuzwisisanga lokho kusho, besaba nokumbuza. Ubukhulu obuyibo nezikhubekiso (Math. 18:1; Luk. 9:46) ³³ Base beza eKapernawume . Kwathi esengene endlini , wababuza wathi : Beniphendulana ngantoni endleleni na? ³⁴ Kepha bathula, ngokuba bebekhulumisene endleleni ngokuthi ngubani omkhulu. ³⁵ Wayesehlala phansi , wababiza abayishumi nambili , wathi kubo : Uma umuntu ethanda ukuba ngowokuqala , makabe ngowokugcina kubo bonke nesikhonzi sabo bonke. ³⁶ Wayesethatha umntwana , wammisa phakathi kwabo , wamgona, wathi kubo: ³⁷ Yilowo nalowo oyakwam ukela abe munye kubantwana abanje ngegama lami uyangamukela mina , ongamukela mina akamukeli mina kodwa ongithumileyo. ³⁸ UJohane wayesethi kuye: Mfundisi, sabona umuntu ongasilandeli ekhipha amademoni ngegama lakho; samnqabela ngokuba engasilandeli. ³⁹ Kepha uJesu wathi : Ningamnqabeli, ngokuba akakho owenza umsebenzi wamandla ngegama lami ongasuka masinyane, akhulume kabi ngami. ⁴⁰ Ngokuba ongamelene nathi ungakithi. ⁴¹ Yilowo nalowo oniphuzisa inkezo yamanzi ngegama lami ngokuba ningabakaKristu, ngiqinisile n githi kini : Akasoze alahlekelwa ngumvuzo wakhe. ⁴² Nalowo okhubekisa abe munye kulaba abancinyane abakholwayo kungangcono kuye ukuba itshe lokusila ligaxwe entanyeni yakhe , aphonswe elwandle. ⁴³ Uma isandla sakho sikukhubekisa , sinqume; kungcono ungene ekuph ileni uyingini kunokuba uye esihogweni , emlilweni ongacimekiyo , unezandla zombili, ⁴⁴ lapho impethu yabo ingafi, nomlilo ungacimi. ⁴⁵ Uma unyawo lwakho lukukhubekisa , lunqume; kungcono ungene ekuphileni ulunyonga kunokuba uphonswe esihogweni , emlilweni ongacimekiyo, unezinyawo zombili, ⁴⁶ lapho impethu yabo ingafi, nomlilo ungacimi. ⁴⁷ Uma iso lakho likukhubekisa , likhiphe; kungcono ungene embusweni kaNkulunkulu uneso linye kunokuba uphonswe esihogweni unamehlo omabili, ⁴⁸ lapho impethu yabo ingafi, nomlilo ungacimi. ⁴⁹ Ngokuba bonke bazakugqunyiswa ngomlilo. ⁵⁰ Usawoti muhle , kepha uma usawoti engasenabusawoti , niyakumhlaziya ngani na? Yibani nosawoti phakathi kwenu, nihlalisane ngokuthula.