¹ Base befika phesheya kolwandle ezweni lamaGerasa. ² Esephume emkhunjini , kwahlangana naye masinyane umuntu ovela emathuneni, enomoya ongcolileyo. ³ Wayehlala emathuneni, kungasekho muntu ongambopha nangeketanga; ⁴ ngokuba wayeseboshwe kaningi ngawozankosi nangamaketanga , kepha amaketanga ayegqashuliwe nguye nawozankosi babephuliwe , kungekho noyedwa owayenamandla okumthambisa. ⁵ Ngesikhathi sonke ubusuku nemini wayesemathuneni nasezintabeni , ememeza, ezilimaza ngamatshe. ⁶ Wathi ukuba ambone uJesu esekude, wagijima, wakhuleka kuye; ⁷ wayesememeza ngezwi elikhulu , ethi: Nginamsebenzi muni nawe Jesu , Ndodana kaNkulunkulu oPhezukonke ? Ngikufungisa uNkulunkulu , ungangihluphi. ⁸ Ngokuba wathi kuye: Phuma kulo muntu, moya ongcolileyo. ⁹ Wayesembuza ethi : Ngubani igama lakho ? Wathi kuye: NginguLegiyona igama lami, ngokuba sibaningi. ¹⁰ Wamncenga kakhulu ukuba angabamukisi kulelo zwe. ¹¹ Kwakukhona lapho ngasentabeni umhlambi omkhulu wezingulube ziklabile. ¹² Bamncenga bathi: Sithumele ezingulubeni ukuba singene kuzo. ¹³ Wabavumela. Omoya abangcolileyo baphuma , bangena ezingulubeni ; umhlambi wagulukudela eweni , waphonseka elwandle kungathi izinkulungwane ezimbili, zaminza elwandle. ¹⁴ Ababezalusa babaleka , baya babika emzini nasemaphandleni ; base beza ukuyobona okwenzekileyo. ¹⁵ Bafika kuJesu, bambona obekhwelwe ngamademoni ehlezi embethe , esangulukile, yena owayenelegiyona; base besaba. ¹⁶ Ababekubonile b abatshela ukuthi kwenzeke kanjani kowayekhwelwe ngamademoni, nangezingulube. ¹⁷ Base beqala ukumncenga ukuba amuke ezweni lakubo. ¹⁸ Wathi ukuba angene emkhunjini , lowo owayekhwelwe ngamademoni wamncenga ukuba abe naye. ¹⁹ Akamvumelanga, kepha wathi kuye : Hamba uye ekhaya kwabakini , ubabikele ukuthi kungakanani iNkosi ekwenzele khona, yakuhawukela. ²⁰ Wamuka-ke, waqala ukulanda eDekapholi ngokuthi kungakanani abekwenzile kuye uJesu; bamangala bonke. Indodakazi kaJayiru ivuswa ekufeni (Math. 9:18; Luk. 8:40) ²¹ Khona uJesu esebuye ewelele ngaphesheya ngomkhumbi , kwabuthana isixuku esikhulu kuye engaselwandle. ²² Kwase kufika omunye wabaphathi besinagoge , nguJayiru igama lakhe , owathi ukuba ambone, waziphonsa phansi ngasezinyaweni zakhe, ²³ wamncenga kakhulu , wathi: Indodakazi yami isiyalela ; ake uze , ubeke izandla phezu kwayo ukuba isindiswe, iphile. ²⁴ Wahamba naye. Isixuku esikhulu samlandela, samcindezela. ²⁵ Owesifazane owayenomopho iminyaka eyishumi nambili, ²⁶ ehluphekile ngokuningi ezinyangeni eziningi , echithile konke ayenakho , engasizakalanga ngalutho, kodwa kwayilokhu kuqhubeka, ²⁷ esezwile ngoJesu, weza esixukwini ngasemuva, wathinta ingubo yakhe, ²⁸ ngokuba wathi: Uma ngingathinta nje izingubo zakhe, ngizakusindiswa. ²⁹ Kwanqamuka masinyane umthombo wegazi lakhe , wezwa emzimbeni ukuthi uphulukile enhluphekweni yakhe. ³⁰ Wanele ukuzwa uJesu phakathi kwakhe ukuthi amandla aphumile kuye , waphendukela esixukwini, wathi: Ngubani othinte izingubo zami na? ³¹ Abafundi bakhe bathi kuye : Uyabona isixuku sikucindezela , usuthi: Ngubani ongithintileyo na? ³² Waqalaza ukuba ambone owenzile lokho. ³³ Khona owesifazane esaba ethuthumela , azi okwenzekile kuye , weza waziphonsa phansi phambi kwakhe, wamtshela iqiniso lonke. ³⁴ Wayesethi kuye: Ndodakazi, ukukholwa kwakho kukusindisile; hamba ube nokuthula; usuphulukile enhluphekweni yakho. ³⁵ Esakhuluma, kwafika abomphathi wesinagoge , bathi: Indodakazi yakho isifile; usamkhathazelani uMfundisi na? ³⁶ Kwathi ukuba uJesu ezwile izwi elishiwoyo , wathi kumphathi wesinagoge: Ungesabi, kholwa kuphela. ³⁷ Akavumelanga muntu amlandele , kuphela oPetru , noJakobe, noJohane umfowabo kaJakobe. ³⁸ Bafika-ke endlini yomphathi wesinagoge , wabona isiyaluyalu nabakhalayo nabalila kakhulu. ³⁹ Wangena, wathi kubo : Niyaluzelani, nikhalelani na ? Umntwana akafile , kodwa ulele. ⁴⁰ Bamhleka usulu . Kepha yena wabakhipha bonke , wathatha uyise womntwana nonina kanye nababe naye , wangena lapho kulele khona umntwana. ⁴¹ Wabamba umntwana ngesandla , wathi kuye: Thalitha, kumi, okungukuthi ngokuhunyushwa: Ntombazana, ngithi kuwe, vuka! ⁴² Yayisivuka masinyane intombazana, yahamba; ngokuba yayineminyaka eyishumi nambili. Khona bamangala ngokumangala okukhulu. ⁴³ Wabayalisisa ukuba lokhu kungaziwa muntu ; futhi wathi mayiphiwe ukudla.