¹ Ungathuli, Nkulunkulu wokubonga kwami. ² Ngokuba umlomo womubi nomlomo wenkohliso bawuvulile ngakimi ; bakhulumile ngami ngolimi lwamanga. ³ Bangizungeza ngamazwi enzondo; balwa nami, kungekho sizathu. ⁴ Ngenxa yothando lwami bayangizonda, mina ngisemkhulekweni njalo. ⁵ Bangibuyisele okubi ngokuhle, nenzondo ngothando lwami. ⁶ Beka omubi phezu kwakhe ; makume omelene naye ngasesandleni sakhe sokunene. ⁷ Ekwahlulelweni kwakhe makalahlwe yicala ; umkhuleko wakhe mawube yisono. ⁸ Izinsuku zakhe mazibe yingcosana, omunye athathe isikhundla sakhe. ⁹ Abantwana bakhe mababe yizintandane, umkakhe abe ngumfelokazi. ¹⁰ Abantwana bakhe mababe yizintandane , baphanze, bacele bekude nezindawo zabo ezichithekileyo. ¹¹ Umtsheleki makabambe konke anakho, abafo baphange izithelo zomsebenzi wakhe. ¹² Makungabikho omenzela umusa , futhi kungabikho ohawukela izintandane zakhe. ¹³ Inzalo yakhe mayinqunywe ; igama layo malesulwe esizukulwaneni esilandelayo. ¹⁴ Ububi bawoyise mabukhumbuleke kuJehova; masingesulwa isono sikanina. ¹⁵ Mabeme phambi kukaJehova njalo , kunqunywe isikhumbuzo sabo emhlabeni. ¹⁶ Ngokuba wayengakhumbuli ukwenza umusa , kepha wazingela umuntu odingayo nompofu nodabukile ngenhliziyo ukuba ababulale. ¹⁷ Wathanda ukuthuka , kweza phezu kwakhe ; wayengathokozi ngesibusiso , sahlala kude naye. ¹⁸ Wagqoka ukuthuka njengesambatho , kwangena ezibilinini zakhe njengamanzi, nasemathanjeni akhe njengamafutha. ¹⁹ Makube kuye njengesambatho asembathay o nebhande azibopha ngalo isikhathi sonke. ²⁰ Lokhu makube ngumvuzo wezitha , uvela kuJehova, nowabakhuluma kabi ngomphefumulo wami. ²¹ Kepha wena Jehova, Nkosi yami , ngiphathe ngokwegama lakho ; njengokuba umusa wakho ulungile, ngisindise. ²² Ngokuba ngingodingayo nompofu; inhliziyo yami ilimele phakathi kwami. ²³ Njengethunzi eselilide ngiyamuka; njengesikhonyane ngiyapheshulwa. ²⁴ Amadolo ami abuthakathaka ngokuzila ukudla , nomzimba wami uswele ukukhuluphala. ²⁵ Futhi ngaba yisihlamba kubona; bengibheka banikina amakhanda abo. ²⁶ Ngisize, Jehova Nkulunkulu wami, ngisindise ngokomusa wakho, ²⁷ ukuze bazi ukuthi lokhu kuyisandla sakho; wena Jehova ukwenzile. ²⁸ Mabathuke bona , wena ubusise ; nxa bevuka , mabajabhe; kepha inceku yakho mayithokoze. ²⁹ Abamelene nami mabembeswe amahloni , bagqoke ukujabha njengesambatho. ³⁰ Ngiyakumbonga uJehova ngomlomo wami, ngimdumise esixukwini. ³¹ Ngokuba uyakuma ngakwesokunene sompofu ukumsindisa kulabo abalahla umphefumulo wakhe.