¹ Ukhona yini umuntu kini, uma enendaba nomunye, onesibindi sokumangala kwabangalungile, kungabi kwabangcwele, na? ² Anazi yini ukuthi abangcwele bayakwahlulela izwe na ? Kepha uma izwe lahlulelwa yinina, anifanele ukunquma namacala amancane na? ³ Anazi yini ukuthi siyakwahlulela izingelosi na ? Kakhulu-ke okwalokhu kuphila. ⁴ Ngakho-ke uma ninamacala alokhu kuphila , niyababeka yini abangenasithunzi ebandleni babe ngabahluleli na? ⁵ Ngisho lokhu ukuba nibe namahloni. Kunjalo kanti : akukho namunye phakathi kwenu ohlakaniphileyo onganquma phakathi kwabaz alwane bakhe na? ⁶ Kodwa umzalwane umangalela umzalwane , nalokhu akwenze phambi kwabangakholwayo na? ⁷ Nempela nakalokhu sekuyisici esikini ukuba nimangalelane. Yini ukuba ningavumi nakanye ukoniwa ? Yini ukuba ningavumi nakanye ukuphangwa na? ⁸ Kepha nina uq obo niyona , niyaphanga; nikwenza lokhu nakubazalwane benu. ⁹ Kepha kanazi yini ukuthi abangalungile abayikulidla ifa lombuso kaNkulunkulu na ? Ningadukiswa. Nazifebe, nabakhonza isithombe , naziphingi, nazihlobongi, nabesilisa abalalanayo, ¹⁰ namasela, nabahahayo, nazidakwa, nazithuki, nabaphangi abayikulidla ifa lombuso kaNkulunkulu. ¹¹ Babenjalo abanye kini , kepha senahlanzwa, senangcweliswa, senalungisiswa ngegama leNkosi uJesu Kristu nangoMoya kaNkulunkulu wethu. Umzimba wethu uyithempeli likaNkulunkulu ¹² Konke kuvunyelwe kimi , kepha akusizi konke . Konke kuvunyelwe kimi , kepha mina anginakubuswa lutho. ¹³ Ukudla kungokwesisu, nesisu singesokudla; kepha uNkulunkulu uyakuqeda kokubili. Kepha umzimba asiwo owobufebe , ungoweNkosi, neNkosi ingeyomzimba; ¹⁴ kepha uNkulunkulu wayivusa iNkosi, nathi uyakusivusa ngamandla akhe. ¹⁵ Anazi yini ukuthi imizimba yenu iyizitho zikaKristu na ? Pho, ngithathe izitho zikaKristu, ngizenze izitho zesifebe na? Qha nakanye. ¹⁶ Kepha anazi yini ukuthi ohlangana nesifebe ungumzimba munye naso na? Ngokuba uthi yena: Labo ababili bayakuba nyamanye. ¹⁷ Kepha ohlangene neNkosi ungumoya munye nayo. ¹⁸ Balekelani ubufebe . Zonke izono azenzayo umuntu zingaphandle komzimba; kepha owenza ubufebe wona owakhe umzimba. ¹⁹ Kepha anazi yini ukuthi umzimba wenu uyithempeli likaMoya oNgcwele okinina, enimamukele kuNkulunkulu, nokuthi anisibo abenu na? ²⁰ Ngokuba nathengwa ngenani elikhulu . Ngakho-ke mbongeni uNkulunkulu emzimbeni wenu.